Les 14: Wie sien jy in die spieël?

   2 Kor 3:18 “En terwyl ons almal met onbedekte gesig soos in ‘n spieël die heerlikheid van die Here aanskou, word ons van gedaante verander na die selfde beeld, van heerlikheid tot heerlikheid, as deur die Here wat die Gees is.”

   Wat sien jy wanneer jy in ‘n spieël kyk: “… terwyl ons almal met onbedekte gesig soos in ‘n spieël kyk – die heerlikheid van die Here aanskou. Alhoewel jy jou eie gesig sien, sê die Woord dat jy die heerlikheid van die Here aanskou. Heerlikheid in die Nuwe Testament is ‘doxa’. Hierdie woord word in die Vines Expository Dictionary soos volg beskryf – “Doxa  primarily denotes an opinion.” Jy sien in die OT was ‘Kabod’ hoofsaaklik die belewenis van die teenwoordigheid van God. Die gewig van God se nabyheid wat ons gedefinieer het as heerlkheid.

  In die Nuwe Testament word dit ‘n hele nuwe verwysing. Dis nou – God se teenwoordigheid is nou in my, maar meer as dit, dit word nou God se uitspraak, God se opinie oor my lewe. Jy sien as ek iemand verheerlik spreek ek positiewe en opbouende woorde oor sy lewe. Nou sê die Skrif, “en terwyl ons almal met onbedekte gesig soos in ‘n spieël die heerlikheid van die Here aanskou, word ek van gedaante verander, van heerlikheid tot heerlikheid,…”

    Omdat ek my tot die Here bekeer het, is die bedekking weggeneem. Omdat my hart nie meer bedek is nie, is my gesig oop om in die spieël te kan kyk. Nou sien ek myself en ek word nóú verander na wat die Here oor my lewe sê. Kyk na jou gesig en spreek hardop uit wat God oor jou sê in die Bybel. Doen dit elke keer as jy in die spieël kyk. Dis Sy opinie oor jou. Hy sit ‘n 10 uit 10 op jou kop. Hierdie is ‘n sleutel. Sy uitspraak oor jou lewe is meer belangrik as enige ander uitspraak deur mense.

    More gaan ons verder met hierdie onderwerp. Onthou jy is ‘n 10 uit 10.